上一編講左我買左 Philips Hue 既智能燈膽，我分別安左四個係客廳，兩個係睡房，而個遙控器就安左係睡房門口。燈膽安裝非常簡單，同平時換燈膽一樣，而個 Hub 就比電，然後直接插網絡線入去 Router，幾分鐘就搞掂晒。硬件設定好，跟住到軟件。上一編有講，我要 Philips Hue 同時支援 Amazon Alexa 及 Apple HomeKit，所以比較多野要設定。我要分三個軟件去設定，分別係 Hue 自己個軟件、 Apple HomeKit 及 Amazon Alexa 既軟件。
 |
| Philip Hue Hub |
Philip Hue App 設定
首先係用 Philips Hue 既 App 去設定先。設定好簡單，只要 Download 左 Philips Hue 個 App，跟 App 既步驟去連接個 Hue，跟住再係個 App 度搜尋燈膽及配件，就會搵到晒所有燈膽及遙控器。
搵到燈膽就要設定房間，我整左個「客廳」及一個「睡房」，然後將燈膽分配入去房間內。呢度既房間名我係入中文，因為我將會用廣東話去叫 Siri 開關某房既燈。
 |
| 設定房名及將燈膽分配入去 |
整好晒所有燈，輪到個遙控器。遙控器可以係配件中設定要控制邊一組燈，以及設定按一下開燈掣時既燈光顏色，按兩下、三下及四下時既燈光顏色。
 |
| 設定遙控器 |
Philips Hue 呢個 App 支援去街自動熄燈、返屋企自己開燈(Home & Away)、早上起身 (Wake Up) 及晚上瞓前 (Go to sleep) 調校燈光等設定。但我會用 HomeKit 及 Alexa 去設定呢幾種功能，所以呢度我冇設定任何野。
 |
| Hue App 選客廳燈顏色 |
Apple HomeKit 設定
要將 Philips Hue 系統連接 HomeKit，可以用返 Philips Hue App 設定內既 "HomeKit & Siri"，首先要輸入 Hub 背面八位數字既 HomeKit 代碼去配對，配對完畢，就已經自動將所有燈、房、情境及遙控器放到 iOS 個 Home App 內。
 |
| HomeKit 代碼 |
 |
| iOS Home App |
我地打開 iOS 個 Home App ，可以見到客廳有四顆燈膽、睡房有兩顆燈膽。我地去編輯客廳其中一個燈膽、然後按 "Group with Other Accessories"「與其他配件一組」 去將另外三顆燈膽組合成一組，每一次呢組燈會一齊開關或轉色。睡房都用同一方法將兩顆燈膽組成一組。設定好後就可以用 Siri 去聲控啦！我可以用 iPhone 或 Apple Watch 叫 Siri「開客廳燈」、「校暗 d 客廳燈」、「熄睡房燈」等！
 |
| Home App 較光暗及顏色版面 |
Apple HomeKit 「自動化操作」設定
Philips Hue 個 App 可以設定日落自動開燈，但無人係屋企都會開燈，所以唔係幾好。而 HomeKit 有個叫「自動化操作」既功能，可以做到日落時有人係屋企先自動開燈。另外我用埋「自動化操作」呢個功能去設定埋夜晚有任何屋企成員返到屋企時會自動開燈。經測試，當我日落後揸車返屋企，泊好車，行緊去電梯大堂，佢已經開定客廳燈等我。有次係屋企，去到日落時間，屋企既客廳燈亦都真係自己著左。而夜晚出街，我冇用自動熄燈既功能，我反而用 Alexa 聲控一個 Routine 去熄燈及熄電視！
 |
| 日落時有人係屋企自動開燈 |
 |
| 夜晚有任何屋企成員返到屋企時會自動開燈 |
Amazon Alexa 設定
設定好 HomeKit，到 Amazon Alexa。打開返 Alexa 個 App，係 Skills 度加返 Hue 個 App，登入返 Philips 個戶口，佢就會加左所有燈、房、情境及遙控器入去個 App 度。因為我地用左中文房名，而 Alexa 唔支援中文，所以我地要續個情境 (Scenes) 入去改返房名做英文，例如將 "Nightlight in 睡房" 改成 "Nightlight in bedroom"，咁我地叫 "Alexa, turn on nightlight in bedroom" 就可以將睡房既燈轉成夜燈模式。
Amazon Alexa Routine 設定
Amazon Alexa Routine 功能係用一句命令來操作一連串動作。我係 Alexa 個 App 加左兩個命令，一個係當我叫 "Alexa, goodbye" ，佢會熄電視、熄音響系統、熄睡房燈、將客廳燈校暗、說一句同我講再見既說話、一分鐘後熄埋客廳燈。另外一個命令係 "Alexa, goodnight"，佢會熄電視、熄音響系統、將客廳燈校暗、開睡房燈並將佢校暗、說一句同我講晚安既說話、一分鐘後熄晒全屋既燈。
如果只係開關燈，用聲控及自動化就已經唔駛再用手。除非想調校燈光顏色，就要用返 Philips Hue 個 App。
No comments:
Post a Comment