宜家傢俬 Tradfri 無線光暗器連接 Philips Hue 系統

宜家傢俬 Tradfri 智能燈具系列有一個遙控器及一個無線光暗器，遙控器既功能類似 Philps Hue 既遙控器，價錢 HK$159.9，同 Philps Hue 個遙控器差好少，所以我冇咩興趣。反而我對 HK$99.9 既無線光暗器有興趣，所以買左返黎試。

燈及無線光暗器

呢個無線光暗器用一粒 CR2032 電，可以控制10個燈膽，轉光暗及開關燈。成個光暗器冇任何機械式操作，佢係用電子感應，好似我地智能電話可以感應到打橫定打直。所以揸住個光暗器係手心，郁下隻手都可以零空轉光暗及開關。

要將個無線光暗器加入去個 Philips Hue 系統：

1. 首先我地要連按光暗器中間銀色個配對掣四次去重設個光暗器。
2. 然後將個光暗器放係 Philips Hue 個 Hub 旁邊，按實配對掣唔放。然後用 "Hue Lights"  App 內既 Touchlink 去搵個光暗器。如果成功連接到我地個 Philips Hue 系統，配對掣旁既燈會著紅色，幾秒後熄返。

中間銀色就係配對掣

呢個光暗器加入左去我地個 Philips Hue 系統後，佢唔會好似 Philips 個遙控器咁，可以用 Philips Hue 個 App 去設定控制邊組燈。因為佢係唔經個 Hub，直接操作燈膽，所以熄左個 Hub，佢都可以繼續操作。

要話佢知佢要控制邊個燈膽，我地就要將個光暗器放係個燈膽旁，然後按住配對掣唔放，配對掣旁既燈會著紅色，一兩秒後，個燈膽會暗左，再等一陣，佢又會光返，咁就成功左啦！我組燈有三個燈膽，我就要三個燈膽續個做一次。

我第一次做時，成功左可以用個光暗器去操作我組燈，但去返 Philips Hue 個 App ，佢寫呢組燈既燈膽全部 unreachable (搵唔到)。原來我將個無線光暗器加入去個 Philips Hue 系統既動作唔成功。咁我重新由上面步驟 1 再做一次，就成功返啦！