選擇智能燈系統

有人覺得智能燈系統只係將所有燈由電話或平版電腦控制及出街都開關到燈。我唔接受開燈時，要拎個電話或平版電腦出黎，解鎖，開個 App，選要開既燈，再按開關，咁樣做仲慢及煩過行去燈掣按一下開關掣。咁我做咩要咁做呢？我要既智能燈系統，係要做到：

• 聲控，坐係梳化唔駛郁就咁叫開關燈、
• 夜晚有任何屋企成員返到屋企時會自動開燈、
• 日落時有人係屋企會自動開燈、
• 瞓覺前或者出街叫佢熄燈，佢會先較暗燈，然後我上左床或出左街先熄燈

將屋企既燈轉為智能系統有三種方法。

1. 將屋企既燈換成智能燈具。例如 Philips 既 LED 智能燈。呢個方法工程好大，要比好多錢買燈，又要搵師傅安燈。

2. 將所有燈掣轉成智能燈掣。我見過大陸有隻牌子叫 Sonoff，一個燈掣只係百幾蚊，價錢好平。我開頭都諗住用呢個方法，但原來用呢種燈掣，你屋企個燈掣入面要有(N)中線。好多香港既屋係冇拉中線去電掣，所以如果要用智能燈掣就要拉過電線，又係工程好大。

3. 最簡單既方法就係換智能燈膽，價錢比換智能燈具平少少，做法簡單，只係好似平時換燈膽咁，拆左舊既燈膽，換個新既智能燈膽上去就完成。

咁我當然係用換智能燈膽呢個方法啦。選好左方法，就要睇下買咩牌子既智能燈膽。市門上有 Philips Hue、Ikea Tradfri、TP-Link Kasa，小米 Yeelight 等牌子，價錢亦都係跟以上既排列，Philips 最貴，小米最平。Philips 一個彩色燈膽要 $598 左右，小米只係 $129 左右。

我要個智能燈支援到 Amazon Alex 及 Apple HomeKit。原來得 Philips Hue 及 Ikea Tradfri 支援到，所以我唔考慮 TP-Link 及 小米。另外一提，Philips 及 Ikea 係用 Zigbee 無線網路技術，所以要另外加個 Hue 去連接上網。而 TP-Link 及小米就直接用 Wifi 上網。兩種方法各有好處及壞處。

Wifi 既好處係大家屋企已經有呢個系統，唔駛再加任何硬件。而唔好處係智能燈膽一定要安係 Wifi 接收到既範圍。另外因為 Wifi 功率好高，要用好多電，所以唔可能有 Wifi 既遙控開關掣。而最大問題係如果 Wifi 壞左，你就控制唔到你既燈。

Philips 遙控開關掣

而 Zigbee 唔好處比較少，只係你要加個 Hub 去連接上網。好處係 Zigbee 係一個無線網狀網路 (Wireless Mesh Network)，提供更廣覆蓋及擴展能力，每個裝置同裝置自己會溝通，任何一個裝置壞左，對整個網絡影響不大。另外因為 Zigbee 功率好低，所以可以有好慳電既遙控開關掣及體感感應器。而當 Wifi 壞左，Hub 都壞埋，個遙控開關掣都可以直接同燈膽溝通，叫佢開或者關。

Philips 體感感應器

Philips Hue 系統既功能比 Ikea Tradfri 完善，所以我就先買左個 Philips Hue White Ambiance E27 Starter Kit 白/黃色入門套裝， 套裝包兩個可變白黃色光既 E27 燈膽、一個 Hub 及一個遙控開關掣。另外我再買多左兩個白黃色光既 E27 燈膽及兩個白黃色光既 E14 燭光型燈膽。

安裝過程及設定過程都唔複雜，我唔詳細講啦！我既情況有少少難搞既地方係我要個系統同時支援 Amazon Alexa 及 Apple HomeKit，而 Alexa 係用英文聲控，Apple HomeKit 既 Siri 就用廣東話聲控，下一編我就講下我個設定方法。