智能家居初接觸

智能家居，好似好勁同好貴既野！因為科技既進步，所以開始變得大眾都可以接觸到既科技。大家初初接觸智能家居，好多時都係由科幻電影開始，最為大家熟悉既就係好似 Iron Man 裡既 Jarvis。可以同你傾計，幫你搵資料及控制其他電器。 

係 2004 年，當時仲未有智能手機既年代，我買左個用紅外線感應開蓋既垃圾桶，當時已經好智能。個垃圾桶用到今日 2018 年都未壞，真係好勁！最近換洗衣機，安洗衣機個師傅見到我個垃圾桶都嘗試用隻手係個垃圾桶上面揮下手玩下，仲好似好新奇咁！可能因為呢種垃圾桶出左十幾年都普及唔到，所以好多人都仲未見過。

係 2006 年，我第一隻吸塵機械人 Roomba 第一代。「機械人」呢三個字，係好多男人眼中真係發光！同人講我有個識吸塵既機械人，真係勁型。當時既 Roomba 跟一個 Virtual Wall，佢會射出一條肉眼睇唔到既光線 (死光)，Roomba 係好怕呢條死光，唔會行過呢條死光。(機械人怕死光係好正常既！) 而呢個吸塵機械人亦係我既救星，我好滿意佢個吸塵效果，所以我唔駛再掃地及吸塵，只係幾個星期先拖一次地！

射死光既 Virtual Wall

係 2010 年，Roomba 第一代終於太勞碌，頂唔順要退役，咁我即刻買左個 Roomba 530 返黎。呢一代既 Roomba 跟一個 Charging Dock，佢吸完塵會自己行返去個 Dock 差電，超型，超智能。呢隻 Roomba 到今日 2018 年，仲服役中。

呢個就係 Dock

之前既垃圾桶及吸塵機，其實只係可以叫做家居自動化。係 2014 年，終於買左第一個真正智能家居既野，係 Lockitron 智能門鎖。當時市場上有用指紋、智能卡或密碼既門鎖，而我就選擇買呢個用智能手機控制既門鎖。用呢個鎖既好處係出街唔駛帶鎖匙，同埋一定唔會唔記得帶電話出街 (因為出門口要用電話鎖門)。而佢既唔好處係食電食得好勁，時常要換電。有時佢會傻左唔識開門，因此我放定左條後備鎖匙係架車度！我試過有一次去跑步，佢又傻左，而我身上冇車匙同後備鎖匙，搞到要等老婆返黎用佢條後備鎖匙先入到屋。感覺上呢隻 Lockitron 都唔太穩定，我用左佢四年，終於換左另一隻智能門鎖。