宜家傢俬 Tradfri 無線動態感應器連接 Philips Hue 系統

Philip Hue 有一個無線動態感應器，可以探測到有人就開燈，冇人就熄燈。佢仲可以跟據唔同既時間設定唔同既燈光效果。例如半夜 12:00 至早上 6:00，如果探測到有人就開暗暗地既燈比你行去廁所。不過呢個動態感應器要成 HK$350 左右，都幾貴。

宜家傢俬 Tradfri 智能燈具有一個簡化版既無線動態感應器，佢只係可以探測到有人就開燈，冇人就熄燈，加埋如果有日光就唔會開燈，但價錢只係 HK$180。所以我就買左一隻黎試下加入 Philip Hue 既系統。

Ikea Tradfri 無線動態感應器

Philip Hue 無線動態感應器 (相片來源: Philip Hue 網頁)

呢隻無線動態感應器用兩粒 CR2032 電，官方話可以用兩年先換電。而一個無線動態感應器可以同時控制10個燈膽。

要將個無線動態感應器加入去個 Philips Hue 系統：
1. 首先我地要連按無線動態感應器背面中間個配對掣四次去重設個無線動態感應器。你會見無線動態感應器正面既紅色燈閃幾下就代表成功左。

2. 然後將個無線動態感應器放係 Philips Hue 個 Hub 旁邊，按實配對掣唔放。然後用 "Hue Lights"  App 內既 Touchlink 去搵個無線動態感應器。如果成功連接到我地個 Philips Hue 系統，無線動態感應器正面既燈會著紅色，幾秒後熄返。

呢個無線動態感應器跟之前既宜家傢俬 Tradfri 光暗器一樣，加入左去我地個 Philips Hue 系統後，唔可以用 Philips Hue 個 App 去設定控制邊組燈。因為佢都係唔經個 Hub，直接操作燈膽，所以熄左個 Hub，佢都可以繼續操作。

跟住我地要話佢知佢要控制邊個燈膽，我地就要將個無線動態感應器放係個燈膽旁，然後按住配對掣唔放，個燈膽會閃幾下，等佢閃完就成功啦！我組燈有二個燈膽，我就要續個燈膽做一次。

呢個燈膽配對試左幾次都唔成功，後來我由上面步驟一開始重新做過，都試左幾次先成功。

係個無線動態感應器背面除左有配對掣，佢仲有兩個掣。一個係設定冇人後幾多分鐘熄燈，可以設定為一分鐘，五分鐘及十分鐘。另外一個掣係設定日頭開唔開燈。

我用左個無線動態感應器一日，我覺得佢對有冇人係度唔係太敏感，我要入左房兩秒左右佢先識開燈。有時我明明坐係度，可能郁得唔太多，佢會以為冇人熄左燈。我諗我去再調整下放個無線動態感應器既位置。