非常好用既 August 智能門鎖

用左四年個舊 Lockitron 智能門鎖，有兩樣野唔係太滿意，一：因為佢有內置 Wifi,，所以電池用得好快，差唔多個個月要換四粒 AA 電，二：佢時不時傻左，開唔到門，要用返鎖匙先開到。感覺唔係太穩定，所以都係時候要換。我所選既智能門鎖必須唔駛改門個鎖位，可以自己安及拆。市場上好似都係得 Lockitron 同 August，咁我就買 August 玩。

August 係用 Bluetooth Low Energy，所以比較慳電，而因為佢冇 Wifi ，另外要加個 Bridge 先可以駁上網。但係要留意，August 本身係支援 Apple 既 HomeKit，所以如果屋企有 Apple TV, HomePod, HomePod Mini 或 iPod，部 Apple TV, HomePod, HomePod Mini 及 iPod 就可以取代 August Bridge。因為我有 Apple TV ，所以就慳返唔駛買個 Bridge。冇 Bridge 既缺點就係支援唔到 Amazon Alexa 及 Google Home。

August Bridge

安裝 August 上去度門係非常簡單，唔駛 15 分鐘就搞掂。跟住就下載佢個 App，做左簡單既設定就用得。而連上 Apple HomeKit，跟返 August 網頁既片做就得。

Setting up HomeKit on Your August Smart Lock

轉左呢個 August 智能鎖，非常滿意。外型上比之前既 Lockitron 靚好多。用電方面，4 粒 AA 電可以用到兩個月，而最好係佢可以用 AA 充電池。(Lockitron 用充電池係唔夠力開鎖架！) (我 12/2020 再換左 August Pro, 去到 3/2021 都未換過電，用左超過一年！)

因為佢支援 HomeKit，所以除左用佢個 August App 開關個鎖外，仲可以用 iPhone 個 Home App、iPhone Siri 聲控、Apple Watch August App、 Apple Watch HomeKit App或 Apple Watch Siri。有時出門口拎住好多野，我就將隻 Apple Watch 放近口邊講 "鎖門" 就鎖左啦！都真係幾方便。

August iOS App

Apple Watch HomeKit App

August 另外有個叫 "Auto unlock" 既功能，當你返屋企時，佢跟據你電話既定位，同你電話既藍芽，知道你係屋門口，就自動開鎖。我開頭都好懷疑得唔得，但試左又真係好好。每次我一出電梯，佢知道我返黎，就開始自動開鎖，我行到屋門口，一推門就入到屋！

你仲可以設定特定時間開關門鎖都會發通知去手機。我設定左係平日返工時間，8:00am 至 6:00pm，如果有開關門鎖就發通知，即係如果有賊爆入屋，我都知！

雖然我冇買個 Bridge，令到個 August 智能門鎖溶入唔到我本來既 Alexa 系統，不過用落影響不大。用左個鎖半年，未試過好似之前個 Lockitron 咁間唔中傻左，半年內次次百發百中，可信性非常高既門鎖！